sapthama shatake - dvitIya stabakaH
ShaDviMsha stabakaH


Agamavinmati kairaviNiinAm.h
bodhamajasramasau vidadhAnaH |
pAtu maheshavadhU-vadanAMsho
hAsa-shashii-sakalAni kulAni ||    1


Ayata-locana-cumbita-karNA
dAna-yashojita toyada-karNA |
shoNanagesha-manaHpriya-varNA
nAshayatAjjagadArtimaparNA ||    2


vedatura~Nga vilocana bhAgyaM
veda shironicayairapimR^igyam.h |
shoka-vidAri sudhA-kiraNAsyam.h
shoNagirau  samaloki rahasyam.h || 3


mu~nca samasta manoratha-lAbhe
saMshayamadya karAmalakAbhe |
dR^ikpathamApa nagendra-tanUjA
so.ahamitaHparamantararAjA ||    4


shilpavidaH pratimAM pravishantii
svalpavidAM taraNAya cakAsti |
shoNadharAbhR^iti samprati labdhA
hanta! cirAdiyameva mamAmbA ||    5


bhArata-bhUvalaye.atra vishAle
santvanaghAni bahUnigR^ihANi |
AsyavigIta sudhAkara-biMbA
shoNagirau ramate.atra madambA ||    6


vArita-saMshritapAtaka-jAlA
vAridhivIchi nira~Nkusha-lIlA |
vArija-patra viDambana netrA
vAraNarAjamukhena saputrA ||    7


Ayata-vakraghanAsita-keshI
toyaja-bANa-riporhR^idayeshI |
kAsha sumAcChayashAH paramaiShA
pAshabhidastu tavendu-vibhUShA ||    8


pa~Nkaja saMbhava pUjitapAdA
pa~Nka vinAshana pAvananAmA |
ki~Nkara kalpalatA parameyaM
sha~Nkara netrasudhA sharaNaM naH ||    9


ca~ncala dR^igvinatAmaravallI
pa~nca pR^iShatka-sharAsana jhillI |
kA~ncanagarbha-mukha-praNuteyaM
pa~ncamukha pramadA sharaNaM naH ||    10


amba vidhUya bhaTAnmadanAdIn.h
nUpuranAda-bibhIShikayaiShaH |
hanta! jahAra balena mano me
shoNanagA~Nghri niveshini te.a~NghriH ||    11


karNapuTe kuru mugdha mamoktiM
mu~nca dhanAdiShu mAnasa-saktim.h |
shoNagirIndravadhU-padabhaktiM
shIlayashIlayuyAsyasi muktim.h ||    12


jIrNatare jarayAkhila dehe
buddhibala~nca vilumpati mohe |
hanta! savitri tapanmatirante
sevitumicChati nA caraNaM te ||    13


tantravido navayoni tu cakraM
shoNadharAdhararupamushanti |
arthamamuShya vapurmadanAre-
rardhamagendrasute tavagAtram.h ||    14


astu nageshwaranandini li~NgaM
taijasametadihApi tavAMshaH |
vItaguNasya vinA tava yogaM
devi! shivasya kutaH khalu tejaH? ||    15


sthApitamUrtiriyaM tava namyA
pujayituM jagadIshvari! ramyA |
shoNanagArdhamidaM tava rUpaM
kIrtayitaM nagaje dhuta-pApam.h ||    16


shoNanagArdhatano.anishama~Nke
dhArayase.ayi! guhaM ramaNAkhyam.h |
Agatamapyayi hA! muhurambo
ccATayase gaNapaM nanu kasmAt.h? ||    17


a~NkajuShe ramaNAya nu dAtuM
mAnavaveSha-dharAya guhAya |
shoNanagArdhatano bahudugdhaM
mAtara-pItakuceha vibhAti ||    18


pUrNasamAdhivashAt.h svapiShi tvaM
pItamapItakuche.amba! na vetsi |
a~NkajuShA ramaNena sutena
prekShya yatheShTamuroruha-dugdham.h ||    19


j~nAna rasAhvayamamba nipIya
stanyamasau ramaNo munirAT.h te |
j~nAnamayo.abhavadIshvari sarvaH
puShyati yena tanuM hi tadAtmA ||    20


prItipadAya payodharakumbhAt.h
pArvati! dhImaya-dugdhamapItAt.h |
astu guhAya shive! bahu dattaM
kiMcidiveshvari! dhAraya mahyam.h ||    21


prauDhamimaM yadi vetsi tanUjaM
shailasute madavAri dadhAnam.h |
mAstu payo-vitarAnaghamannaM
yena dadhAni maheshvari shaktim.h ||    22


svArjitameva mayA yadi bhojyaM
sammada eva mamAkhila-mAtaH |
AshiShamagryatamAmayi! dattvA
preShaya yAni jayAni dharitrIm.h ||    23


vidyuti vidyuti vIkShya vilAsA
vIkShita-karmaNi lakShyarahasyA |
pArvaNa-candramukhI lalitA~NgI
taijasali~Nga-sakhI sharaNaM naH ||    24


mAtarapItakuce.aruNa shailA-
dhIshvara-bhAmini bhAmahanIye |
sAdhu vidhAya samarpayate te
dodhaka-mAlyamidaM gaNanAthaH ||    25


|| iti umAsahasre ShaDviMsha stabakaH ||